أولا طرق التنفيس

هناك من طرق التنفيس ما أقوم بة بالفعل و هناك ما اتمنى القيام بة لعلمى انة بالفعل يريحنى نفسيا و لكنى لا استطيع :

• – لو كانت حالة الضيق شديدة جدا جدا فملجأى الوحيد هو القراّن الكريم ولا أشعر بالراحة إلا بقرائتة

لكن لو حالة من حالات الغضب و الضيق العادى ممكن اعمل التالى :

• – أحب انى أخرج وأغير من الجو المحيط بى ..أخرج فقط و قد يكون مجرد تمشية و لكنى أشعر بجزء من الراحة بعدها .
• – أحب انى اشغل موسيقى او أغنية بصوت عالى جدااااااااااااا يمكن بحس ان فى شىء جديد بيكسر حدة الحالة اللى انا فيها .
• – ما اقدرش افش غضبى فى حد ما عنديش الرفاهية دى لأنى أصغر إخوتى …يا بخت الكبار .
• -أحب جداُ انى أجلس مع الأطفال الصغيرين لما أحس بضيق , بحس بجمال عالمهم و نقاؤة , بحب أتكلم معاهم و أبتسم على انبهارهم بأشيائى
  الصغيرة و رؤيتهم لكل شىء بأنة حاجة كبييييييرة نفسهم يفهموها أو تكون عندهم , أحب أوى انى أخرج من حالة الضيق اللى انا فيها بأنى اعمل اى شىء يسعد طفل صغير بحس انى لما يفرح انا كمان بفرح و بخرج و لو جزئيا من حالتى .
• -
  طبعا لو كان فى بحر فدة يكون شىء جمييييييل من اكثر الحاجات اللى تريح من حالتى النفسية و لكن صعب انى اروحة باستمرار أو وقت ما أحب و
  علشان كدة كان نفسى جدا انى اعيش فى اسكندرية كنت فى نهاية كل يوم اذهب للتمشية على شاطىء البحر , ما فيش احسن من كدة وسيلة لتفريغ شحون و هموم اليوم ..
• -فى أغلب الوقت لا أحب انى أتحدث مع أحد فيما يضايقنى ولا أعرف السبب فى ذلك على الرغم من إنى استمع لغيرى .

تاج الإنطباعات من مبرمج حرو سميتة كدة لانة فى انطباعات كتيرة :

أحب شخص لقلبك في الدنيا؟

والدتى ووالدى .

انسان مستعد تضحي بحياتك – ركز فى كلمة حياتك – عشانه؟

نفس الإجابة السابقة .

انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟

اللى سمموا مصر بالأمراض الخبيثة , اللى زرعوا المرض فى كل لقمة بناكلها فى كل منتج فى المياة فى رغيف العيش, اللى اتسببوا فى إصابة فرد أو اتنين على الأقل بالمرض فى كل عائلة مصرية و أكلوا ملايين و راحوا عاشوا و اتمتعوا بفلوسنا المنهوبة فى شرم الشبخ أو برة مصر فى الحتت النضيفة , اللى خلانا نشك فى كل حاجة بناكلها او نشربها انها بتسبب المرض و فى الاّخر نلاقى ناس بيحافظوا على صحتهم جدا و برضة متصابين , اللى عمل كدة معروف و أظن انتوا كلكم عارفينهم و بالإسم كمان ..أظن الصحة أهم من كل شىء و دلوقتى خلاص مصر بقت موبوءة بالمرض من الهوا و المياة و الأكل ..تفتكروا مش دة سبب للحقد ؟

ما هو اسم اجمل كتاب كتبه بشر قراته ومحتفظ به حتي الان؟

“شجرة تنمو فى بروكلين “ للكاتبة الأمريكية “بيتى سميث ” من أعظم ما قرأت حتى الاّن و لم أحظى بنفس التأثر العقلى و الوجدانى اللذان تحققا عندما قرأت هذا الكتاب الرائع .

اسم كتاب كتبه بشر برضة- انت متعلق بيه وبتقرأه كل فترة؟

اية معنى السؤال دة بالمقارنة بالسؤال التانى , مانا الكتاب السابق متعلقة بية و بقرأة كل فترة و اكيد دة حال اى اجابة للسؤال السابق .

اهم جهاز منزلى انت متعلق بيه او بتستخدمه كتير؟

الكمبيوتر .

مكان تحس بالراحة عندما تدخله؟

المسجد

شىء تحس بالراحة النفسية عندما تنظر اليه؟

البحر بحبة جدا و بحس انى فعلا بغسل همومى فية .

مكان تحس فيه بالحنين الى شىء لا تدرى ماهو و ذكريات جارفة الى لاشىء؟

امم , مافيش ..اية الشاعرية المفرطة دى

اجمل مدينة زرتها داخل مصر ؟

اسكندرية .

أجمل مكان طبيعي رأيته داخل مصر ؟

بحر اسكندرية .

شخصية كارتونية بتحب ؟

اليس فى بلاد العجائب , بحبها اوى اوى و كنت و انا صغيرة احب الأرنب بتاعها “بنى بانى ” .

نوع هاتفك المحمول؟

نوكيا ..انا حاسة ان مؤلف التاج دة عاوز يعمل بحث بين المدونين عن أعلى الهواتف المحمولة استخداما..

سرعة بروسيسور جهازك؟

GH 2.40 .

حجم ذاكرة –هارد- جهازك؟

الرام : 512 ميجا و الهارد : 80 جيجا .

المساحة التى تشغلها المواد الاسلامية على جهازك؟

بفضل انى أقرأ الكتب الدينية عن سماع أو رؤية اى محتوى دينى , و بعدين ممكن ان الواحد يجمع المحتوى بكم على جهازة و ما يشوفهوش.. و لو شافة يمكن ما يستفيدش بة .سؤال يلخص ثقافة المظهر دون المضمون .

نفس المساحة السالف ذكرها فى قلبك -الاجابة لنفسك عشان الرياء يا اخواننا -؟

شىء بينى و بين ربى .

أهم هدف انت واضعه لحياتك الآن؟

أحب أحتفظ بية لنفسى .

مواصفات فتاة الأحلام بالنسبة لك؟

اما اكون راجل هبقى اجاوب .

صف ما يأتى:شعورك لما بتسمع كلمة مصر ؟

المرارة .

شعورك لما بتسمع كلام عن اليهود؟

الخيبة .

شعورك لما بتشوف ظابط شرطة؟

مزيج من الحقد و التوجس .

شعورك لما بتشوف الكناس العجوز فى الطريق؟

بيفكرنى دايما بأننا شعب لا يحترم قيمة العمل , مجتمع طبقى يتشدق بشعارات لا يطبقها , كلة ألقاب باشا و بية و بك , مجتمع وحوش ليس للضعيف فية مكان.

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

حرية شخصية ولا تدل على شىء أو تثبث شىء , ممكن حد لابس كدة و يكون فاهم الإسلام صح و ممكن لا .

احساس يراودك فى اشارة مرور مغلقة بسبب مسئول كبير؟

ان البلد دى انا قيها ضيفة و انها بلدة هو .

امم..أفكر بخرق بنود الديمقراطية هذة المرة ..و امرر هذة التمريرات لحائر و هارون و ميامى ..

اسم مدونتك ؟
مقتطفات FTM .

لماذا اخترته.. ماذا تقصد به ؟
لأن اول انطباع لى عندما تعرفت على المدونات انها مقتطفات , شىء يشبة عبارة “من هنا و هناك ” FTM هو اختصار ل FATMA و ايضا كما فى العنوان ™ F وطبعا هى علامة حقوق الملكية .فهو يحقق معنيان فى إسم واحد , فكرت فى اسماء او جمل تعبر عن المدونة ولكن الشىء الغريب انى ما وجدتش اى جملة ممكن تعجبنى لدرجة انها تعبر عن المدونة و عنى , و كان هذا العنوان هو اقرب إسم يعبر عنى فجزء منة يمثل رؤيتى للتدوين و جزء منة اسمى .

هل فكرت في إغلاق المدونة.. والسبب ؟
انا فعلا فى فترة توقفت تماما عن الكتابة بعد ستة شهور من بدء المدونة لأنى كنت مشغولة و لكنى عدت بعدها و صممت انى احاول اعمل موازنة لكى احتفظ بالمدونة دائما و إن شاء اللة ما يجيلى الخاطر دة .

صورتك فى المدونة ..رمزيتها ؟
ما فيش صورة..نفس السبب لعدم اختيار اسم او جملة للمدونة لإنى مش شايفة صورة او رمز معين ممكن يعبر عنى , لكن ممكن أعمل زى شعار صغير لإسم المدونة .

طبيعة كتابتك فى المدونة بشكل عام ..سياسة ..قصة ..عبث ..كلام فاضى ؟

كل شىء يستوقفنى ولو لدقائق و يجعلنى افكر فية ممكن اكتبة فى مدونتى , كمبيوتر , ادب , شعر , خواطر, سياسة , دين..الخ ,المدونة هى فكرى بكل اتجاهاتة و أرى ان الكتابة التخصصية تخرج بالتدوين الى مفهوم اّخر , فالمدونات هى أشخاص هى تعبير عن الشخصية بكل ميولها ولا يفترض فيها ان تكون موحدة الإتجاة و فى حالات التخصص قد نطلق على الموقع مسميات مثل مجلة أو عمل صحافى أو ادبى.

لماذا تدون أصلا ؟
– التدوين يتيح لك ان تساهم بشكل فعال فى سير الأحداث من حولك حتى لو لم تؤثر فى صناع القرار فعلى أحسن الأحوال قد يؤثر كلامك ولو فى فرد واحد .

– لكى أرى نفسى و أعرف من اكون .

– التدوين نافذة على العالم الخارجى ترى فيها انعكاس لأفكارك على نطاق اوسع من المحيط الذى تعيش بة .

– لإنى احب فكرة تسجيل أفكارى على الورق تجعلنى اشعر كلما قلبت فى كتاباتى القديمة اننى املك ايامى الماضية و انها لم تضيع و هذا الإحساس نفسة موجود فى التدوين .

– ممكن يكون نسبة منة شعورى بالمساهمة فى سمة من سمات العصر قد أشعر بافتقاد ان لم أساهم فى تكوينة

أحلى جملة قيلت لك فى وصف مدونتك ؟
امم..كتير كتير …. الحقيقة أى كلام حلو عن مدونتى عزيز عليا.

التعليقات بالنسبة لك ..أهميتها ؟

. مهمة جدا , هى احساسى ان فى إهتمام بما اكتب و تفاعل يحفزنى اكتر للمتابعة

أحلى بوست كتبته ..ضع اللينك ..ثم اذكر لماذا ؟
قصيدة فى الكود , المبرمج الشاعر
و دة مش تحيز للموضوعات التقنية بقدر ما ان الموضوعين دول شغلوا فكرى فترة طويلة جدا لحد ما كتبت عنهم اخيرا

افضل مدونة قرأتها ..يمكن اختيار عدة مدونات ؟
فى مدونات كتيرة بحبها و باتابعها و صعب جدا تحديد مدونة واحدة لإن كل مدونة لها مميزات غير الأخرى.

أفضل بوست قرأته ..يمكن اختيار اكتر من لينك ؟
مثل الإجابة السابقة .انا عجبنى مثلا بوست تقنى جدا جدا و فى نفس الوقت عجبنى بوست سياسى فى مدونة اخرى و بوست عن الخواطر فى مدونة تالتة و هكذا عشرات المواضيع التى أثرت فى جدا ولا يسع الحديث ذكرهم كلهم .

هل خسرت صديق بسبب كتابة هنا ؟
الحمد للّة لا .

حد قل ادبه فى التعليق ..ايه رد فعلك ؟
لا و لو كان ببساطة لن انشر تعليقة .

أسوأ مدونة ..الاجابة اجبارية ..يمكن اختيار عدة مدونات ..هما كتير اصلا ؟
فى مدونات يتفق عدد كبير على كونها اسوأ مدونات و هى المدونات التى تعتدى على حقوق الاّخرين بسب أديانهم و الهزء بمقدساتهم لا لسبب إلا للشهرة الزائفة أو لمحاولة إضفاء صبغة التحرر الفكرى من أغلال الدين و رسم صورة المثقف الثورى و هم أبعد ما يكون عن الثقافة فالثقافة أولا و أخيرا لا بد وان تدفع بصاحبها للرقى و التحضر و احترام الاّخرين و هو ما لا ألمسة فى أصحاب تلك الكتابات , و فى مدونات أراها انا سيئة طبقا لرؤيتى الشخصية و قد لا يتفق معى الكثير فأنا على سبيل المثال لا احب كل من يدس فى حديثة اى لفظ نابى يخدش الحياء و يجرح شعور الزائر وتختلف هنا طبيعة المدونة و هدفها فهناك من يقوم ببعثرة هذة الألفاظ دون محتوى هادف مثل هذة المدونات لا أعود لها ابدا و هناك من يستخدم هذة الألفاظ فى موضوعات قيمة و هادفة و فى الحالة الأخيرة للأسف اتصفح تلك المدونات واتابعها ولكنى لا أشارك مطلقا فى الحوار و اتحول فى هذة الحالة لفرد فى ظاهرة مهمة جدا فى عالم التدوين قرأت عنها فى موقع veerle و هى المتسللون الذين قد تراهم فى عداد الزائرين و لكنهم لا يشاركون ابدا فى التعليق .

أسوأ بوست ؟
فى كتير

أسوأ مدون ؟
فى كثير برضة

احب أرسل التمريرة دى لناس كتير فى بالى , اللى يحب ياخدة يعتبر انى وجهت لة الدعوة .